Bu gün Qış olimpiadasının Açılış mərasimi keçiriləcək

  Bölmə: Olimpiya Növləri | 500 | 11:02 09-02-2018
Bu gün Qış olimpiadasının Açılış mərasimi keçiriləcək
Bu gün Cənubi Koreyanın Pxençxan şəhərində XXIII Qış Olimpiya Oyunlarının Açılış mərasimi keçiriləcək.
 
Olimpiya Stadionunda baş tutacaq tədbir Bakı vaxtı ilə saat 15:00-da start götürəcək. Oyunlarda Azərbaycanın nümayəndə heyətinə Milli Olimpiya Komitəsinin (MOK) vitse-prezidenti Çingiz Hüseynzadə rəhbərlik edəcək. Onunla yanaşı, gənclər və idman nazirinin müavini İsmayıl İsmayılov, MOK-un baş katibinin müavini Azər Əliyev, Azərbaycanın şef de-missionu Anar Bağırov, Gənclər və İdman Nazirliyinin idman şöbəsinin müdiri Fərid Mansurov və digər şəxslər Pxençxana yollanıblar.
 
Açılış mərasimində bayraqdar funksiyasını Azərbaycanın yeganə təmsilçisi Patrik Braxner yerinə yetirəcək. O, dağ xizəyi idmanında slalom və böyük slalom yarışlarına qatılacaq.
 
Ümumilikdə rekord sayda - 92 ölkənin iştirak edəcəyi Qış Olimpiya Oyunlarında 2902 idmançı öz qüvvəsini sınayacaq. Onlar 7 idman növündə 102 dəst medal uğrunda mübarizə aparacaqlar. 
 
Təxminin 3 milyarddan artıq tamaşaçının izləyəcəyi Oyunlara ən geniş heyətlə ABŞ gəlib – 242 idmançı. Kanada ikinci (226), İsveçrə üçüncüdür (169). Ev sahibləri isə 122 idmançı ilə təmsil olunacaqlar. Həmçinin, 168 nəfər Rusiya idmançısı dopinq qalmaqalına görə Beynəlxalq Olimpiya Komitəsinin bayrağı altında mübarizə aparacaq.
 
Pxençxanda 6 ölkə Qış Olimpiya Oyunlarında debüt edəcək. Bunlar Kosovo, Ekvador, Nigeriya, Eritreya, Malayziya və Sinqapurdur. Olimpiadanın rəsmi talismanı ağ pələng Suxoranq, qara ayı Pandabidir.
 
Qeyd edək ki, XXIII Qış Olimpiya Oyunlarının Bağlanış mərasimi fevralın 25-də keçiriləcək.

Digər xəbərlər