Orxan Məmmədov: "Rəhbərlik olaraq məşqçinin arxasındaydıq" - MÜSAHİBƏ

  Bölmə: Ölkə futbolu | 2043 | 08:49 21-05-2018
Orxan Məmmədov: "Rəhbərlik olaraq məşqçinin arxasındaydıq" - MÜSAHİBƏ
Topaz Premyer Liqasının sonuncu turunda səfərdə "Sumqayıt"ı 2:1 hesabı ilə məğlub edən "Zirə"nin fəxri prezidenti Orxan Məmmədov oyundan sonra jurnalistlərin suallarını cavablandırıb.
 
O, öncə mövsümü dəyərləndirib.
 
- Biz rəhbərlik olaraq axıra kimi komandamızın arxasında durmuşuq. İnanırdıq. İkinci dövrə bizim üçün çox çətin başladı. Gözlənilməz nəticələr oldu. Amma futbolçular sona kimi vuruşdular. Axıra yaxın çeviriliş edə biləcəyimizə şübhəm yox idi. Hər şey bizim əlimizdə deyil. İnanırıq ki, kubokun finalında şad xəbər eşidəcəyik. Komanda Avropa Liqasına və hədəflərimə çatacaq.
 
- Uzun müddət komanda büdrədi. Baş məşqçiyə isə etimad göstərməyə davam etdiniz. Qəbələdən şad xəbər gəlməsə, Ayxan Abbasovla davam edəcəksiniz?
- Əlbəttə. Futbol çətin oyundur. Həmişə hədəfə doğru gedəndə gözlənilməz nəticələr olur. Biz isə rəhbərlik olaraq məşqçinin arxasındaydıq. Ona inanırıq. Şəxsən mən özüm inanıram. Nəticədən asılı olaraq növbəti mövsüm üçün müzakirə aparacağıq.
 
- Qışdan sonrakı uğursuzluqla bağlı komandada zədəli, cəzalı futbolçular oldu. Transferlərə də ehtiyac var idi. Növbəti mövsüm üçün transferlər barədə nə düşünmüsünüz?
- Düzgün vurğuladınız. Qış fasiləsindən sonra komandada çoxlu zədəli və cəzalı futbolçular oldu. Bu isə bizim nəticələrə öz təsirini göstərdi. Ehtiyat oyunçular skamyasında az futbolçu var. Avropa Liqasına vəsiqə qazanası olsaq, transfer məsələsinə baxılacaq. Heyətimiz güclənməyə doğru gedəcək.
 
- Qəbələdə "Keşlə” qalib gəlsə, bu günkü sevinc ürəyinizdə qalmış kimi olacaq. Bu komanda üçün bir zərbə ola bilərmi?
- 11 oyun yaxşı nəticə əldə edə bilmirdik. Həmin oyunlardan sonra çevriliş etmək uğurdur. Ona görə mən inanmıram ki, bizim sevincimizə nəsə mane ola bilər. Ötən il olduğu kimi Avropa Liqasında oynamaq istəyirik. Bizim sevincimizi heç bir şey pozmayacaq.
 
- Rəhbərlik olaraq baş məşqçi ilə görüşünüz kubok oyunundan sonra bəlli olacaq?
- Kubok oyunundan sonra qərar verəcəyik.
 
- "Zirə” klubunun imic baxımından dəyişiklik üçün layihələri varmı?
- Bəli. Bizim bəzi layihələrimiz var. Futbolumuz irəliləməyə doğru gedir. Ölkə rəhbərliyinin siyasəti futbolun inkişafına təkandır. Biz də "Zirə” olaraq buna öz töhvəmizi vermək istəyirik.
 
- Kubukun finalı üçün Qəbələyə gələcəksiniz?
- Bəli elə bir fikrimiz var.

Digər xəbərlər