Qurban Qurbanov: "Malta ilə matçın əhəmiyyətini hamımız yaxşı bilirik"

  Bölmə: Ölkə futbolu | 103 | 17:17 14-10-2018
Qurban Qurbanov: "Malta ilə matçın əhəmiyyətini hamımız yaxşı bilirik"

"Hər oyunumuz vacibdir. Matçların sayı azaldıqca, daha vacib olur. Çətin, fərqli sistemdə çıxış edən rəqibə qarşı oynayırıq. Matçın əhəmiyyətini hamımız yaxşı bilirik. Futbolçularımızın bu qarşılaşmaya hazır olacağını düşünürəm”.

Bunu Azərbaycan millisinin baş məşqçisi Qurban Qurbanov UEFA Millətlər Liqasının IV turunda Malta yığması ilə oyundan əvvəl söyləyib.

Mütəxəssis Bakı Olimpiya Stadionunda təşkil edilən mətbuat konfransında sualları da cavablandırıb.

"Qarabağ"da yaxşı oyun, millidə isə daha çox nəticə tələb olunur. Futbolçuları gah buna, gah digərinə kökləmək problem deyil ki?

- Yaxşı nəticə üçün yaxşı oyun göstərmək lazımdır. Bunun üçün çalışırıq. Bəli, fərqli komanda və turnirlərdir. İstənilən görüşə yaxşı oyun göstərmək üçün çıxırıq.

Heyətdə dəyişiklik olacaq?

- Farer adaları ilə müqayisədə ciddi dəyişiklik olmayacaq. Sabah səhər məşqindən sonra heyəti müəyyənləşdirəcəyik.

Bir ay əvvəllə müqayisədə Maltada nə kimi dəyişiklik var?

- Malta həm bizə, həm Kosovoya, eləcə də, Farer adalarına qol vurub. Bu da onu göstərir ki, diqqət etməliyik. Kosovo ilə səfər görüşlərinə baxmışıq. Bu komandaya qol vurmaq və buraxmamaq üçün diqqətli olmalıyıq.

Mifsudun yoxluğu bizim üçün üstünlükdür?

- Bu oyunçuya rəğbətim var. 37 yaşında bu cür hərəkətli olması digərlərinə nümunədir. Onun oynamayacağına sevinmirəm. İstəyirəm ki, yaxşı futbolçular meydanda olsun. Onun yoxluğunun rəqibin oyununa təsir edəcəyini düşünmürəm.

Rüfət Dadaşovu daha öncə çağırmadığınıza görə təəssüflənmirsiz ki?

- Xeyr. Biz hər bir futbolçunu daha hazır olanda çağırmaq istəyirik. Lakin bəziləri formada olmurlar. Amma biz onları çağırmağa məcburuq. Çünki oyunçu seçimi çox deyil. Rüfəti lazımi vaxta komandaya dəvət etdik.


Digər xəbərlər