Azərbaycan cüdoçuları ilin ilk beynəlxalq yarışında mübarizəyə başlayıb

  Bölmə: Digər növlər | 1215 | 09:45 25-01-2019
Azərbaycan cüdoçuları ilin ilk beynəlxalq yarışında mübarizəyə başlayıb

 İsrailin paytaxtı Təl-Əvivdə cüdo üzrə ilin ilk beynəlxalq yarışı – Qran Pri start götürüb.

Turnirdə Azərbaycanı 12 kişi və 6 qadın tatami ustası təmsil edəcək. 

İlk yarış günündə onlardan 9-u qüvvəsini sınayacaq və hamısı mübarizəyə 1/16 finaldan başlayacaqlar. Kişilərin 60 kq çəki dərəcəsi üzrə mübarizəsində Rəşad Yelkiyevlə Rövşən Əliyev iştirak edəcək. Onlar ilk görüşlərində müvafiq olaraq israilli Alon Aharon və sloveniyalı Matyaj Trboviçlə qarşılaşacaq. 66 kq-da Orxan Səfərov türkmənistanlı Məhəmməd Kossekov, İbrahim Əliyev isə ABŞ idmançısı Koul Çandlerlə üz-üzə gələcək.

Qadınların yarışında 48 kq çəkidə yarışan Əliyeva Leylanın ilk rəqibi rumıniyalı Aleksandra Popdur. Eyni çəkidə yer alan Aişə Qurbanlı isə ispaniyalı Sinte Qarsiya Mesa ilə görüşəcək. 52 kq-da Gültac Məmmədəliyeva finlandiyalı Katri Kakko, Buyankişiq Purevsuren isveçrəli Fabienne Koxerlə qarşılaşacaq.

İçinxorlo Munxtsedev isə 57 kq çəkidə israilli Şaked Amihay ilə üz-üzə gələcək.

Qeyd edək ki, Rüstəm Orucov, Hidayət Heydərov (hər ikisi 73 kq) və Murad Fətiyev (81 kq) yanvarın 25-də, Məmmədəli Mehdiyev, Tural Səfquliyev (hər ikisi 90 kq), Elmar Qasımov (100 kq), Uşanqi Kokauri, Şahin Qəhrəmanov (hər ikisi +100 kq) və İrina Kinderzka (+78 kq) isə ertəsi gün yarışacaq. Qran Pridə 53 ölkədən 379 idmançı mübarizə aparır. Turnirin mükafat fondu 100 min dollardır.


Digər xəbərlər