Qurban Qurbanov: "Bu suala bilmirəm nə cavab verim"

  Bölmə: Ölkə futbolu | 194 | 08:32 07-10-2019
Qurban Qurbanov: "Bu suala bilmirəm nə cavab verim"

Futbolçuları təbrik edirəm. Çətin yox, ağır qrafikdəyik. Həm çempionat, həm də UEFA Avropa Liqasında oynayırıq. Oyunçularda istək həddindən artıq çox olmalıdır. Çox aktiv görünürdülər. Onlara təşəkkür edirəm. Qələbə asan olmadı. Meydanda çox istəkli “Sabah” gördük. Əsas odur ki, 3 xal qazandıq.

Bu sözləri “Qarabağ” klubunun baş məşqçisi Qurban Qurbanov Premyer Liqanın 8-ci turunda öz meydanında “Sabah”ı məğlub etdikləri (2:0) matçdan sonra təşkil olunmuş mətbuat konfransında deyib.

O, digər komandaların “Qarabağ”a qol vurmaqda çətinliklə üzləşmələrinə münasibət bildirib: “Kollektivdə qol buraxmamaq istəyi çoxdur. Bu gün də qapımızda təhlükəli epizodlar oldu. Bəzən müdafiəçilərimiz, bəzən isə qapıçı çox çalışır”.

Təcrübəli məşqçi oyunda zədələnən Mahir Emreli haqqında da danışıb: “Onun topuq hissəsi şişib. Gördüyümüz qədər durumu yaxşı deyil. Sabah durumuna tam aydınlıq gələcək. Onun xəsarət almasını istəməzdik. Bunlara hazır olmalıyıq”.

Qurbanov qarşılaşmadakı hakimlər barədə də fikirlərini bölüşüb: “Oyun ərzində irad bildirmədim. Baş hakimin görüşün əvvəlində iki sarı vərəqə verməsi məni özümdən çıxardı”.

Q.Qurbanov Rusiyanın “Spartak” komandasının onunla maraqlanması iddiası haqqında bunları söyləyib: “Deyəsən, xəbər çıxdı ki, yeni baş məşqçiləri bəlli olub. Belə yazılara o qədər də önəm verməyək”.

Məşqçi sözlərinə milli komandaların oyunları ilə əlaqədar yaranan fasilədə yoxlama oyunu keçirmək istədiklərini də əlavə edib: “Ən azı bir oyun keçirmək niyyətindəyik. Amma ola bilər ki, bu 90 dəqiqəlik matç olmasın. Qarşılaşmanı oktyabrın 12-ə planlaşdırırıq. Məşq əvəzinə belə bir oyun keçirməyi planlaşdırırıq”.

O, “Qapıçı Asmir Beqoviçi yanvar ayından sonra Ağdam klubunda saxlamağa gücünüz çatacaqmı?” sualına belə cavab verib: “Bu suala bilmirəm nə cavab verim. Amma hər şey ola bilər”.


Digər xəbərlər