Yaşar Vahabzadə, Vidadi Rzayev və Nadir Şükürov Premyer Liqa komandasına futbol dərsi keçdilər

Yanvarın 25-də futbol üzrə Azərbaycan kubokunun səkkizdəbir final mərhələsi çərçivəsində “Sabah” doğma meydanda “Kəpəz”i qəbul edib.

OLİMPSPORT xəbər verir ki, “Bank Respublika Arena”da keçirilən qarşılaşmaya meydan sahibləri fəal başlayıblar. Görüşdə hesabı birinci hissəyə əlavə edilmiş dəqiqələrdə Bakı təmsilçinin müdafiəçisi Filip İvanoviç açıb. Matçın 68-ci dəqiqəsində isə Gəncə klubu hesabı bərabərləşdirməyə nail olub. Samir Qurbanov “Kəpəz”in birinci qolunu vurub. Görüşün 84-cü dəqiqəsində isə Gəncə təmsilçisi hesabda önə keçib. Əli Səmədov vurduğu qolla komandasına qələbə qazandırıb. 

Beləliklə, rəqibi ilə müqayisədə çox az büdcəyə sahib olmasına baxmayaraq, Yaşar Vahabzadənin, Vidadi Rzayevin,Nadir Şükürovun və Əli İsmayılovun məşqçilik etdiyi "Kəpəz" Premyer Liqa komandasına futbol dərsi keçdi. Görünür bu təcrübəli məşqçilərdən hələ çox komandalar futbol dərsi öyrənəcək. 

Ölkə kubokunun səkkizdəbir final mərhələsinin digər oyunlarında “Səbail” öz meydanında “Zaqatala”nı (3:2), “Qəbələ” səfərdə “Turan Tovuz”u (2:0), “Zirə” isə “Qaradağ Lökbatan”ı (4:0) məğlub edib.

Azərbaycan kubokunun dörddəbir final mərhələsində isə “Sumqayıt” – “Səbail”, “Qarabağ” – “Qəbələ”, “Neftçi” – “Zirə” və “Keşlə” - “Kəpəz” klubları üz-üzə gələcəklər.

Dörddəbir final mərhələsinin birinci matçları fevralın 1-2-də, cavab görüşləri isə ayın 6-7-də keçiriləcək.