Azərbaycan güləşçiləri Dünya Seriyasını 3 medalla başa vurdu

Yunanıstanın Katerini şəhərində çimərlik güləşi üzrə dünya seriyasının 4-cü mərhələsi keçirilib.

Turnirdə ölkəmizi baş məşqçi Oyan Nəzərianinin rəhbərliyi altında 3 güləşçi təmsil edib.

Ramiz Həsənov (70 kq) qrup mərhələsində gürcüstanlı Levan Kelexaşviliyə (1:2) məğlub olsa da, amerikalı Miçel Kuka (3:0) hesabıyla qalib gələrək yarımfinala yüksəlib. Bu mərhələdə rumıniyalı Stefan Yonut Komana minimal fərqlə (2:3) uduzan Ramiz fransalı Kuentin Stikeri 3:0 hesabıyla üstələyərək Dünya Seriyasında növbəti dəfə bürünc medal qazanıb.

Omid Kamaliaqdam (80 kq) qrupda macarıstanlı Şaba Vidaya (1:2) uduzub, ispaniyalı Pablo Qarsiya və yunanıstanlı Xristos Kutsuridisdən 3:0 hesabıyla üstün olub. Omid yarımfinalda gürcüstanlı Nika Kentçadzeyə (0:3) uduzduqdan sonra rumıniyalı Maksim Vasiloqlo üzərində 3:2 hesablı qələbəylə bürünc medal əldə edib.

İbrahim Yusubov (90 kq) isə bütün görüşlərini 3:0 hesablı qələbəylə başa vurub. Təcrübəli güləşçimiz qrupda fransalı Matis Mayrand və belçikalı Conas Van Kaenegemə, yarımfinalda gürcüstanlı Dato Prizaşviliyə, finalda isə Gürcüstanın digər təmsilçisi Davit Kutuşviliyə qalib gələrək çempion olub.

Beləliklə millimiz yarışı 1 qızıl və 2 bürünc medalla başa vurub. Azərbaycan 55 xalla komanda hesabında 2-ci yeri tutub. Gürcüstan (90) birinci, Rumıniya (44) isə üçüncü olub.

Dünya Seriyasının final mərhələsi sentyabrın 3-4-də Rumıniyanın Konstansa şəhərində keçiriləcək.