Azərbaycanlı yunan-Roma güləşçisi dünya çempionatında yarımfinal mərhələsinə adlayıb

Bakı, 20 oktyabr, OlimpSport.az

Serbiyanın Novi Sad şəhərində güləş üzrə U-23 dünya çempionatına start verilib.

OlimpSport.az xəbər verir ki, ilk yarış günündə Azərbaycanın 4 yunan-Roma güləşçisi mübarizəyə başlayıb.

Ziya Babaşov (63 kiloqram) yaponiyalı Miruto Tokuhiqaya 7:1, iranlı Mohammad Navidə 3:1 hesabı ilə, rusiyalı Dоrdji Şunqurtsikova isə ilk xal prinsipinə əsasən (1:1) qalib gələrək yarımfinala yüksəlib. O, bu raundda türkiyəli Servet Angi ilə qarşılaşacaq.

Digər güləşçilər Davud Məmmədov (77 kiloqram) və Laçın Vəliyev (87 kiloqram) ilk görüşlərində rəqiblərinə məğlub olublar. Ayxan Mərdanov (130 kiloqram) isə startda çinli Şuanqyu Çenə "tuş"la qalib gələrək 1/4 finala yüksəlsə də, bu mərhələdə rusiyalı Aleksandr Melexova (UWW) 0:9 hesabı ilə məğlub olub.

Qeyd edək ki, mundiala oktyabrın 27-də yekun vurulacaq.