Sadıq Sadıqov vəzifəsindən istefa edib

“Neftçi” İdman Klubunun rəhbərliyində kadr dəyişikliyi olub. 

OlimpSport.az xəbər verir ki, bu barədə klubun saytının yaydığı açıqlamada bildirilib.

Məlumatda bildirilib ki, İdarəetmə aparatının rəhbəri Sadıq Sadıqov öz istəyi ilə vəzifəsindən azad edilib. O, klubun İdarə Heyəti sədrinin müşaviri vəzifəsinə təyinat alıb. 

Buna qədər İdarə Heyəti sədrinin müşaviri vəzifəsini tutan Fərəc Əliyev isə klubun İdarə Heyəti sədrinin müavini və klubun icraçı direktoru əvəzi təyin edilib.

Məlumatda o da bildirilir ki, icraçı direktor vəzifəsi İdarəetmə aparatının rəhbəri vəzifəsinin yerinə təsis edilib.

Xatırladaq ki, S.Sadıqov 2009–2015-ci illərdə "Neftçi" Peşəkar Futbol Klubunun prezidenti olub. Onun rəhbərliyi altında "Neftçi" 3 dəfə Azərbaycan çempionu və 2 dəfə ölkə kubokunun qalibi adını qazanıb. 2012-ci ildə "Neftçi" Azərbaycan futbolunun tarixində ilk dəfə olaraq Avropa Liqasının qrup mərhələsində iştirak edib.