Rauf Əliyev “Kukesi”yə qələbə qazandırdı

Futbol üzrə Albaniya çempionatında 2-ci turun oyunları keçirilib. Azərbaycanlı hücumçu Rauf Əliyevin formasını geyindiyi “Kukesi” də növbəti matçına çıxıb. Sözügedən kollektiv doğma meydanda “Laçi” ilə qarşılaşıb. Futbolçumuzun komandası bu oyundan qələbə ilə ayrılıb – 3:0.

Millimizin üzvü də bu görüşün iştirakçısı olub. Rauf start heyətdə meydana çıxıb. O, komandasının qələbəsində də xüsusi pay sahibi olub. Belə ki, 61-ci dəqiqədə məhz onun qapıya ünvanladığı top hesabın açılması ilə nəticələnib. “Kukesi”nin sosial şəbəkələrdəki səhifələri həmin qolu məhz Raufun vurduğunu vurğulasa da, digər internet resurslarında avtoqol qeydə alındığının şahidi oluruq. O, 38-ci dəqiqədə sarı vərəqə ilə də cəzalanıb.

Qeyd edək ki, “Kukesi” hazırda 7 xalla 10 komanda arasında 2-ci pillədə qərarlaşıb.