Bakı Olimpiya Stadionu Respublika Stadionu ilə əvəz olunacaq

Azərbaycan millisinin DÇ-2018-in seçmə mərhələsi çərçivəsində Almaniya ilə matçının məkanı dəyişdiriləcək. Olimpsport.az xəbər verir ki, bu barədə gənclər və idman naziri Azad Rəhimov məlumat verib.

 

Nazir bildirib ki, yığmamız gələn ilin mart ayında Almaniyanı çox güman ki, Bakı Olimpiya Stadionunda qəbul etməyəcək: “Almaniya ilə qarşılaşma üçün Olimpiya Stadionu qeydiyyatdan keçib. Ancaq çox güman ki, oyun orda baş tutmayacaq. Biz də istərdik ki, Almaniya ilə matç 68 minlik arenada keçirilsin. Təbii ki, 68 minlə 32 min arasında böyük fərq var. Bu dəyişiklik İslam Oyunlarının Əməliyyat Komitəsi ilə bağlıdı. Əməliyyat İşlərimiz buna imkan vermir. Bununla bağlı UEFA-ya müraciət etmişik. Lakin çox güman ki, qeydiyyat yerini dəyişib, Tofiq Bəhramov adına Respublika Stadionunun adını verəcəyik. Oranın da ot örtüyü əla vəziyyətdədi”.

 

Qeyd edək ki, Azərbaycan – Almaniya matçı gələn il, martın 26-da keçiriləcək.