Azərbaycan Futzal Federasiyasının prezidenti Zaur Axundov AFFA-nın rəsmi saytına müsahibə verib. Olimpsport.az həmin müsahibəni təqdim edir.
- İlk dəfə futzal üzrə dünya çempionatının final mərhələsində iştirak edən millimiz 1/8 finala yüksəlib. Təəssüratlarınızı bilmək maraqlı olardı...
- Fürsətdən istifadə edib futbol ictimaiyyətini millimizin uğurlu çıxışı və növbəti mərhələyə yüksəlməsi münasibətilə təbrik edirəm. Çətin oldu, amma qarşıya qoyulan ilkin vəzifənin öhdəsindən gəldik. İlk iki oyundan sonra mübarizəni davam etdirəcəyimizi 99 faiz təmin etmişdik. Ancaq ikinci pilləni tutmaq şansımız da real idi. İran millisi də növbəti mərhələdə güclü rəqiblə qarşılaşmamaq üçün var gücü ilə oynadı. Elə vəziyyət yaranmışdı ki, ikinci pilləni tutmaq üçün bizi heç-heçə də qane edirdi. Sona qədər mübarizə apardıq, futzal tariximizdə ilk dəfə iştirak etdiyimiz dünya çempionatında mərhələ adladıq.
 
- Milli komandanın qrup mərhələsi çərçivəsində keçirdiyi oyunları necə xarakterizə edərdiniz?
- Bir həftə ərzində komandamız 3 oyun keçirdi. Təbii ki, hər üçündə eyni oyunu nümayiş etdirmək, sadəcə, mümkün deyil. İstər futbolda, istərsə də futzalda oyunun alınmasından çox şey asılıdı. Mərakeşlə oyunumuzun xüsusilə də birinci 10 dəqiqəsi çox çətin, ağır keçdi. Tədricən uşaqlar toparlandılar və oyunlarını nümayiş etdirməyə başladılar. İspaniyaya qarşı isə komanda yaxşı oynadı. Məğlub olmağımıza baxmayaraq, lazımi qədər mübarizə apara bildik. İranla oyuna gəldikdə, futzalçılara tapşırdım ki, arxayınlaşmaq olmaz. Birgə izlədiyimiz İran – Mərakeş matçında birincilərin gücünü qoruduqlarının şahidi olmuşduq. Üstəlik, taktiki baxımdan bizi yaxşı təhlil etmişdilər. Bir sözlə, bizi öz "silah"ımızla vurmaq istəyirdilər. Buna hardasa birinci hissədə nail oldular, oyun planında onlara uduzurduq. Fasilədən sonra futzalçılarımız anladı ki, bir top fərqi ilə uduzmaq bizi nə qədər geri salacaq. Toparlandıq və ikinci hissədə layiqli mübarizə apardıq. Tarixdə nəticə qalır. Biz də dünya çempionatımızdakı çıxışımızı tarixin yaddaşına həkk etdirdik.
 
- İspaniya yığması ilə görüşün birinci hissəsində millimizin rəqibə yaşatdığı sürprizi İran millisi də komandamıza yaşatmağa çalışdı demək olarmı?
- Demək olar, üst-üstə düşdü. İran bizim zəif tərəflərimizi yaxşı təhlil etmişdi. Müdafiə xəttimizi yarırdılar, bu da çaşqınlıq yaradırdı. Açığı, bunu gözləmirdik. Fasiləyə 1:1 hesabı ilə yollansaq da, oyun planında rəqibə uduzduq. Fasilə zamanı həm məşqçilər, həm də mən paltardəyişmə otağında oyunçuları "ayıltmağa” çalışdıq. İran nə İspaniya, nə də Braziliyadı, onlara qarşı oyunda uduzmamalıydıq. Meydana çıxanda da heç vaxt heç-heçə üçün oynamağı qarşıya tapşırıq kimi qoymamışıq.
 
- Necə düşünürsünüz, yeni məşqçi heyətinin qurduğu komanda sizin gözlədiyiniz kimi oynayır?
- Komanda cəmi 2 aydı bir yerdədir. Oyun zamanı futzalçılar arasında anlaşılmazlıq olur, bəzən bir-birlərini yaxşı başa düşmürlər. Narahat olduğumuz məqamdı. Bu problemin aradan qalxması üçün zamana ehtiyacımız var. Oyun təcrübəsi çoxaldıqca, bu problem həllini tapacaq. Bu gün qələbə istəyi öz sözünü dedi.
 
- Növbəti rəqib Tailand yığması olacaq. Ümumiyyətlə, millimiz üçün elə qrafik yaranıb ki, hətta yarımfinala da yüksəlmək mümkündü...
- Zamanı qabaqlamayaq. İlk rəqibimiz Tailand millisidi. Onların heyəti 40 dəqiqə dayanmadan qaçan gənclərdən qurulub. Əksər oyunçuları gənclərdi. Təbii ki, bizə qarşı ciddi hazırlaşacaqlar. Eyni zamanda, biz də boş dayanmayacağıq. Məqsədimiz yaxşı çıxış etməkdi.
 
- Maraqlıdı, 2010-cu ildə Avropa çempionatının final mərhələsində debüt edən millimiz bürünc medal qazanmağa yaxın oldu. Budəfəki siftənin də o cür uğurlu alınacağına inanırsınızmı?
- AFFA rəhbərliyinin, eləcə də federasiya rəhbəri kimi mənim komanda qarşısında qoyduğum vəzifə tam yerinə yetirildi. Artıq 1/8 finaldayıq və bu böyük uğurdu. Təbii ki, növbəti addımı da atmağın zamanıdı. Bu uşaqların oyuna hazırlığından, meydandakı çıxışından asılı olacaq.
 
- Millinin əksər üzvü həm də "Araz” klubunun formasını geyinir. Oktyabrda UEFA kubokunun əsas mərhələsində çıxış edəcək təmsilçimiz üçün dünya çempionatının xeyirli olacağını düşünmək olarmı?
- İşimizi həm asanlaşdırır, həm də çətinləşdirir. Güclü rəqiblərə qarşı oynayan futzalçılarımız oyun təcrübəsi qazanır, özünəinamı artır. Digər tərəfdən sıx qrafiklə oynayan oyunçularda yorğunluq müşahidə olunacaq və bu, Makedoniyada keçiriləcək əsas mərhələnin oyunlarında özünü büruzə verəcək. Amma milli naminə hər şeyi etməyə hazırıq. Milli komanda "Araz”dan daha vacibdi. Futzalçılarımız ölkəmizin adını layiqincə təmsil etmək, bayrağımızı sonuncu oyunda dalğalandırmağa nail olmaq üçün əllərindən gələni edəcəklər.