Kubokda 1/4 final həyacanı
Bu gün Azərbaycan Kubokunda 1/4 final mərhələsinə start veriləcək. Olimpsport.az xəbər verir ki, mərhələnin ilk oyunları eyni gündə baş tutacaq.
Mərhələyə Qəbələdə start veriləcək. Premyer Liqanın favoritlərindən biri olan, hazırda turnir cədvəlinin ikinci pilləsində qərarlaşan "Qəbələ" autsayder AZAL-ı qəbul edəcək. Mərhələnin əyalətdə keçiriləcək yeganə dueli olacaq matçda aşkar favorit var. Premyer Liqada qalmaq uğrunda mübarizə aparan AZAL-ın çempionluq iddiasında olan rəqibinə ciddi müqavimət göstərəcəyi inandırıcı deyil. Roman Qriqorçukun yetirmələri hətta cütün taleyini doğma azarkeşləri önündə həll etməyə çalışacaqlar.
Bu gün baş tutacaq yeganə paytaxt derbisində “Zirə” “Neftçi”ni qəbul edəcək. Premyer Liqada keçirdiyi 13 oyundan 10-da uduzan "Neftçi" bütün ümidlərini kuboka bağlayıb. Turnir cədvəlində yalnız AZAL-ı qabaqlayan "ağ-qaralar" üçün avrokuboklara ən asan yol kubokdan keçir. Amma onların işi heç də asan olmayacaq. Aparıcı üzvlərinin xidmətindən məhrum olan "Neftçi"nin baş məşqçisi Elxan Abdullayevin xidmətində cəmi 14 futbolçu qalıb ki, onlardan da 8-i gənclərdi. "Zirə" isə ötən ilki kimi iddialı çıxış etməsə də, kubokda mümkün qədər irəli getmək niyyətindədi. İlk oyunda meydan sahibləri aşkar favoritdi.
Premyer Liqada ilk "üçlüy"ü qapayan "İnter" turnir cədvəlindəki qonşusu olan "Kəpəz"i qəbul edəcək. Hər iki komanda avrokuboklara vəsiqə iddiasındadı və çempionatla yanaşı, kuboka da önəm verir. 2000-ci ildən bəri kubokda yarımfinal üzü görməyən “Kəpəz” uğursuzluq seriyasını qırmaq üçün əvvəlcə paytaxtda sərfəli nəticə əldə etməlidi. “Bankirlər” isə ardıcıl 3-cü dəfə yarımfinala vəsiqə qazanmağa çalışacaq. Cütün aşkar favoriti "İnter" hesab olunur.
Günün son görüşündə son iki mövsümdə kubokun qalibi olmuş “Qarabağ” “Sumqayıt”ı qəbul edəcək. Qurban Qurbanovun komandası cütün favoritidi və heç zaman iddialı olmayan "Sumqayıt" çətin ki, onlara ciddi müqavimət göstərsin. "Qarabağ" cütün taleyini ilk matçda həll etməyə çalışacaq.
Qeyd edək ki, 1/4 finalın cavab oyunları dekabrın 21-də keçriləcək.
Azərbaycan Kuboku
1/4 final
İlk oyunlar
13 dekabr
15.00 Qəbələ - AZAL
Hakimlər: Fariz Yusifov, Vaqif Musayev, Azər Əsgərov, Rəvan Həmzəzadə.
AFFA nümayəndəsi: Vaqif Davudov.
Hakim-inspektor: Asim Xudiyev.
Qəbələ şəhər stadionu.
17.00 Zirə - Neftçi
Hakimlər: Əliyar Ağayev, Rza Məmmədov, Namiq Hüseynov, Mübariz Haşımov.
Əlavə köməkçi hakimlər: Ömər Paşayev, Elvin Əsgərov.
AFFA nümayəndəsi: Maşallah Əhmədov.
Hakim-inspektor: Xaqani Məmmədov.
Zirə İdman Kompleksinin stadionu.
17.00 İnter - Kəpəz
Hakimlər: Rəhim Həsənov, Yaşar Abbasov, Nahid Əliyev, Rahil Ramazanov.
Əlavə köməkçi hakimlər: Rauf Cabbarov, İnqilab Məmmədov.
AFFA nümayəndəsi: Sakin Məmmədzadə.
Hakim-inspektor: Məlik Həsənov.
“İnter Arena”.
18.00 Qarabağ - Sumqayıt
Hakimlər: Orxan Məmmədov, Elman Musayev, Knyaz Əmiraslanov, Vüsal Qənbərov.
Əlavə köməkçi hakimlər: Ramil Diniyev, Ramil Əhmədov.
AFFA nümayəndəsi: Ramiz Abdullayev.
Hakim-inspektor: Şahin Cəfərov.
“Azersun Arena”.