“Azərbaycan Beynəlxalq Bankı” “İnter” Peşəkar İdman Klubuna bank tərəfindən sponsorluğun dayandırıb

“Azərbaycan Beynəlxalq Bankı” ASC-nin (ABB) İdarə Heyəti “İnter” Peşəkar İdman Klubuna bank tərəfindən sponsorluğun dayandırılmasına qərar verib. Olimpsport.az xəbər verir ki, bu bərədə apasport.az saytına məlumatı ABB-nin mətbuat xidmətindən veriblər.

 

Belə bir addımın atılmasında məqsəd yeni fəaliyyət mərhələsində olan bankın biznesin optimallaşdırılması və restrukturizasiya proseslərinin aparılmasıdı.

 

Bankın İdarə Heyətinin sədri Xalid Əhədov bununla bağlı qeyd edib ki, bu, bankın xərclərinə qənaət etmək məqsədi daşıyır: “Yeni strateji hədəflərinə uyğun olaraq idman sferasındakı fəaliyyətini məhdudlaşdırmaq ABB-yə öz xərclərinə qənaət etməyə, mövcud imkan və resursların, əsas fəaliyyət istiqamətlərinə, yəni, sırf bank-maliyyə sahəsinə cəlb olunmasına, beləliklə, bankın dövlət dəstəyi ilə sağlamlaşdırılması tədbirlərinin daha effektiv şəkildə həyata keçirilməsinə imkan verəcək”.

 

Bu qərarla bağlı digər hüquqi-texniki məsələlər qanunvericiliyə uyğun şəkildə mərhələ-mərhələ öz həllini tapacaq. Bankın müvafiq qərarla əlaqədar müraciətinə uyğun olaraq Azərbaycan Futbol Federasiyaları Assosiasiyası (AFFA) “İnter” klubunun cari mövsümün sonuna qədər oyunlarda iştirakı məqsədilə bütün lazımi işlər üçün öz dəstəyini verəcək. ABB “İnter” PİK-in təsisçisi kimi qalacaq və klubun idarəçiliyi idarəetmə müqaviləsi əsasında peşəkar komandaya ötürüləcək. Klub sponsor üçün açıq elan olunur. Kluba sponsorluq etmək istəyənlər bununla bağlı AFFA-ya müraciət edə bilər.

 

Qeyd edək ki, klubun lisenziyalaşdırılması çərçivəsində götürülmüş öhdəliklər (o cümlədən, lisenziyalaşdırma prosesi çərçivəsində nəzərdə tutulan maliyyə zəmanəti) ABB tərəfindən yerinə yetiriləcək.