Ramin Musayev Birinci Diviziondakı yeniliklərdən danışdı - FOTOLAR

Bu gün AFFA-nın inzibati binasında futbol üzrə Azərbaycan Birinci Divizionunun 2017/18 mövsümünün püşkatma mərasimi keçirilib. Püşkatma mərasimində Peşəkar Futbol Liqasının prezidenti Ramin Musayev, iştirakçı klubların rəhbər şəxsləri, eləcə də jurnalistlər iştirak etdilər. 

Peşəkar Futbol Liqasının Mətbuat və İctimaiyyətlə Əlaqələr Departamentinin rəhbəri Aslan Şahgəldiyev qonaqları salamladıqdan sonra PFL prezidenti Ramin Musayev çempionatla bağlı bir sıra maraqlı məqamlara aydınlıq gətirib. Rəhbər şəxs əvvəlcə çempionatın reqlamenti barədə məlumat verib:

“Hər birinizi salamlayıram. Bütün komandalara yeni mövsümdə uğurlar arzu edirəm. 2017/18 mövsümündə çempionatda 10 komanda iştirak edəcək. Yarış 3 dövrədən ibarət sistemlə keçiriləcək. 3-cü dövrədə 1-ci dövrədə olan uyğunluq tətbiq olunacaq. Biz 10 komandalı çempionatı 2 dövrə etsəydik, oyun sayı az olacaqdı. Komandaların daha çox oyun keçirməsini rəhbər tutub 3 dövrəli yarışa qərar verdik”.

Ramin Musayev Birinci Divizionda limit məsələsinə aydınlıq gətirib: “Topaz Premyer Liqasında olduğu kimi, Birinci Divizionda da protokolda 23 futbolçu yer ala bilər. Oyunlar zamanı ilk onbirlikdə 6 nəfər yerli oyunçu olmaq şərti ilə daha yaşlı oyunçuların çıxışına icazə veriləcək. Meydançada hər zaman ən azından 1996-cı il və daha gənc təvəllüdlü 3 oyunçunun olması şərtdi. Klublar start heyətində maksimum 2 legionerin xidmətindən yararlana biləcəklər”.

Ramin Musayev əlavə edib ki, Birinci Divizion FİFA-nın təsdiq etdiyi və artıq Azərbaycana gətirilən yeni toplarla oynanılacaq.

PFL prezidenti eyni zamanda klublara xəbərdarlıq edib: “Ötən mövsüm bəzi xoşagəlməyən hallar oldu. Belə ki, Birinci Divizionda iştirak edən komandaların adları danışılmış oyunlarda hallandı. Buna görə də hər oyunda bizim nümayəndəmiz olacaq və lazımi qeydlərini götürəcək və digər prosedurlar həyata keçiriləcək. Hər hansı bir şübhə yeri olarsa, araşdırılacaq və oyunun nəticəsi ləğv olunacaq. Oyun alqı-satqısında adı hallanan oyunçunun adı hüquq mühafizə orqanlarına təqdim olunacaq və onunla bağlı lazımi ölçü götürüləcək”.

Peşəkar Futbol Liqasının prezidenti  Ramin Musayev sonda  mətbuat nümayəndələrinin suallarını cavablandırıb və iştirakçı klubların nümayəndələri ilə xatirə şəkli çəkdirib.