Elxan Məmmədov: "Rəşad Sadıqovsuz bizə çətin olacağını etiraf etməliyik"
"Bizim üçün çətin olacağını etiraf etməliyik. Çünki Rəşad millinin ən yaxşı oyunçularından biri idi". Bu sözləri "Olimpsport"-a açıqlamasında AFFA-nın baş katibi Elxan Məmmədov deyib.
DÇ-2018-in seçmə mərhələsi çərçivəsində sonuncu ev oyununda Çexiyanı qəbul edən millimiz 1:2 hesablı məğlubiyyətə üzülüb. AFFA rəsmisi matçdan sonra jurnalistlərə müsahibə verib. O, öncə milli karyerasını başa vuran Rəşad Sadıqov haqda danışıb: "O, vətəni və futbolu sevən insandı. Rəşada gələcək məşqçilik karyerasında ancaq uğurlar arzu edə bilərəm".
- Rəşadı tezliklə milli komandalarımızın birindəı məşqçi vəzifəsində görə bilərik?
- İnşallah. İlk növbədə təcrübə toplamalıdır. Bilirsiniz ki, hazırda "Qarabağ"ın U-19 komandasında çalışır. İnanıram ki, Rəşad yaxşı məşqçi olacaq.
- Prosineçkinin millidəki gələcək taleyi necə olacaq?
- Sözün düzü, bu məsələni müzakirə etmirik. Çünki qarşıda bir oyunumuz var.
- Ümumiyyətlə, özü komandada qalmaq istəyir?
- Danışmamışıq.
- Son açıqlamalarında hiss olunur ki, qalmaq fikri var...
- Hər bir baş məşçi işini davam etdirməyi arzulayır. Lakin bizə heç nə deməyib. Biz əvvəlcədən razılaşdıq ki, müqavilə bitəndən sonra müzakirə aparaq.
- Ümumiyyətlə, onun işi sizi qane edir?
- Nəzərə almalıyıq ki, 10 xalımız var və bu, bizim üçün rekorddu. Təbii ki, daha çox xal qazanmaq üçün imkanımız var idi. Unutmayaq ki, 3 oyundan sonra bizim 7 xalımız var idi.
- Elxan müəllim, millətlər liqasının reqlamenti qəribədi. Sanki D divizionuna düşmək daha az xalımızın olması bizə sərf edir.
- Bəli, əslində, belə bir şey var. Seçmə mərhələ oyunları bitəndən sonra reytinq müəyyən olunacaq. Bu gün üçün Azərbaycan millidi D divizionuna düşür. Hazırda biz C divizionundayıq, D-yə düşürük. Amma onu da deyim ki, qarşıda seçmə mərhələsi var və orda da səbətlər mövcuddur. Yəni, bir-birini kompensasiya edə bilər. Ümumiyyətlə, bununla bağlı tədbir təşkil edəcəyik və Millətlər Liqası barədə ictimaiyyətə məlumat verəcəyik.
- Hər oyundan sonra millinin baş məşqçisi AFFA rəhbərliyinə hesabat verir. Baş məşqçidə öz komandasında oynamayan futbolçulara qarşı sevgi var. Ondan bunun səbəbini soruşmusunuz?
- O da baş məşqçidi. Amma bu barədə danışmaq çətindi. Görək, Almaniyaya qarşı kimlər oynayacaq, ondan sonra danışacağıq.