Maksim Medvedev: “Karyeramızın ən vacib oyununa çıxmışdıq”

UEFA Çempionlar Liqasının qrup mərhələsində Madriddə sensasyon şəkildə “Atletiko” ilə 1:1-lik bərabərliyə qalan “Qarabağ”ın müdafiəçisi Maksim Medvedev İspaniyaya ezam olunmuş azərbaycanlı jurnalistlərin suallarını cavablandırıb. Təcrübəli müdafiəçi ən çətin anları azlıqda qaldıqdan sonra yaşadıqlarını etiraf edib.

- Matç çətin keçdi?
- Karyeramızın ən vacib oyununa çıxmışdıq. Hamımız səbrsizliklə gözləyirdik ki, nəticə necə olacaq? Rəqibdən çəkinmədik, qorxmadıq, əlimizdən gələni elədik ki, tapşırıqları yerinə yetirək. Qırmızı vərəqəyə qədər hər şey super idi. Ondan sonra oyun tam sındı, müdafiəyə oturduq və gücümüz sürətlə azalmağa başladı. 20-25 dəqiqə “Atletiko”ya qarşı 10 nəfər oynamaq çox çətindi.
 
- “Atletiko”dan iki oyunda xal aldınız. Növbəti ev oyununda “Çelsi”dən də xal almaq olarmı?
- İndi kim oynumuzu izləyir, tələb edir ki, hamıdan xal alaq. Ancaq biz özümüz də dərk edirik ki, asan bir şey deyil. Əgər oyun alınsa, əlbəttə ki, xal götürmək olacaq. Yaxşı analiz edəcəyik. “Çelsi”dən ilk matçda 6 qol buraxmışdıq. İndi çalışmalıyıq ki, rəqibdən qorxmayaq, öz oynumuzu göstərək, onda nəticə də olacaq.
 
- Heç olmasa, üçüncü yeri tutub Avroliqaya getmək haqqında düşünürsüz?
- Biz qrupa çıxanda hamı sevindi və artıq nəsə tələb olunmurdu. Üzərimizdə də təzyiq yox idi. Ona görə də sərbəst çıxırıq və bacardığımızı edirik. Sərbəstlik olanda futbolçu öz potensialını göstərə bilir. İndi 3-cülük üçün də şansımız var və buna inanırıq.
 
- Keçən matçda Dino, indi də Pedro qırmızı vərəqə aldı. Bunlar komandaya nə dərəcədə təsir edir?
- Həm Dino, həm Pedro komanda üçün böyük fiqurlardı. Bu gün Ndlovunun yerində Ramil var idi, çalışrdı ki, yoxluğu bilinməsin. Ancaq onlar fərqli oyunçulardı. Gələn görüşdə də Pedronu kimsə əvəz edəcək. İstər-istəməz sistem dəyişəcək. Ancaq  bizim yaxşı ehtiyat qüvvəmiz var və onlar “qırmızı” alanları layiqincə əvəzləyəcəklər.