38-ci qış çempionatına start verilib

Fevralın 3-də Respublika Olimpiya Mərkəzində atletika üzrə  38-ci qış çempionatına start verilib.

Böyüklər arasında keçirilən çempionatda atletlər 60, 200, 400, 800, 1500 və 3000 metr məsafələrə qaçış, 4x200 metr məsafədə estafet qaçışı, uzunluğa, hündürlüyə və üçtəkanla tullanma, eləcə də nüvəitələmə yarışlarında qüvvələrini sınayırlar.

Çempionatın açılış mərasimində çıxış edən Milli Olimpiya Komitəsinin vitse-prezidenti, Azərbaycan Atletika Federasiyasının prezidenti Çingiz Hüseynzadə Prezident İlham Əliyevin ölkəmizdə idmanın inkişafına göstərdiyi yüksək diqqət və qayğısı nəticəsində respublikamızın dünyada idman dövləti kimi tanındığını deyib. O, Azərbaycanda idmanın digər növləri kimi, atletikanın da sürətlə inkişaf etdiyini bildirib, bu baxımdan belə turnirlərin əhəmiyyətini vurğulayıb. Ç.Hüseynzadə cari ildə Polşada keçiriləcək üçüncü Avropa Oyunlarında Azərbaycan atletlərinin də iştirak edərək medal qazanacaqlarına ümidvar olduğunu bildirib.

Azərbaycan çempionatında atletlərin göstərdikləri nəticələrin gələcəkdə onların beynəlxalq yarışlarda iştirakına imkan yaradacağını deyən federasiya prezidenti idmançılara uğurlar arzulayıb.

Gənclər və İdman Nazirliyinin sektor müdiri Nicat Həsənov ölkəmizdə idmanın inkişafına göstərilən diqqət və qayğıdan danışıb, respublikamızda çoxsaylı yerli və beynəlxalq turnirlərin yüksək səviyyədə təşkil olunduğunu bildirib. O, ölkəmizdə atletikanın kütləviliyinin artırılması baxımından çempionatın önəmini vurğulayıb.

Ümumilikdə 140 idmançının qatıldığı çempionat iki gün davam edəcək. Yarışlarda Bakı şəhəri ilə yanaşı, Gəncə, Bərdə və Sumqayıtdan olan atletlər də iştirak edirlər. Çempionatda 11 komanda mübarizə aparır.
Atletika üzrə 38- ci qış çempionatının ilk gününün qalibləri:
60m Qadınlar - Lamiyə Vəliyeva 7,72

Nüvə itələmə qadınlar - Hüseynova Günel - 11,43

60m kişilər - Əli Abdiyev 6.97

400m qadınlar - İsrafilova Tutuxanum

3 təkanla tullanma kişilər - Rüstəm Məmmədov 15,91

3 təkanla tullanma qadınlar - Sariyeva Yekaterina 12,98

400m kişilər Məmmədov Səid 55.99

1500m qadınlar - Anna Yusupova 4:49.98

1500m kişilər - Hüseynov Allahqulu 4:31.32

Nüvə itələmə kişilər - Əliyev İsmail - 15,84