Nazir AİJA rəhbərliyini qəbul edib

Gənclər və idman naziri Fərid Qayıbov Beynəlxalq İdman Mətbuatı Assosiasiyasının (AIPS) və Avropa İdman Mətbuatı İttifaqının (UEPS) ölkəmizdəki yeganə rəsmi təmsilçisi Azərbaycan İdman Jurnalistləri Assosiasiyasının rəhbərliyini qəbul edib. 

AİJA-nın prezidenti, əməkdar jurnalist Eldar İsmayılov nazirə Assosiasiyasının 27 illik fəaliyyəti haqda danışıb, təşkilatın son 2 ildə keçirdiyi tədbirlərin hesabatını verib. 

Daha sonra Eldar İsmayılov AİJA-nın "İlin idman adamı" seçdiyi nazirə xüsusi plaket, Fərid Qayıbovun AİJA-ya 2004-cü ildəki üzvlük anketinin nüsxəsini, yeni AİPS, AİJA vəsiqələrini təqdim edib. 

AİJA-nın baş katibi, İdman TV-nin direktoru Rövşən Binnətli idmanımızda görülən işlərin doğru təbliği üçün media ilə nazirliyin sıx əməkdaşlığının vacibliyini vurğulayıb. 

AİJA-nın vitse-prezidenti, Sports.az saytının rəhbəri Anar Şabanoğlu Fərid Qayıbovun təyinatından sonra AGİN-in fəaliyyətindəki pozitiv dinamikadan söz açıb, idmana göstərilən diqqətin idman mediasına da göstərilməsini arzuladığını bildirib. 

Görüşün sonunda nazir AİJA-ya gələcək fəaliyyətində müvəffəqiyyətlər arzulayıb, təşkilatın rəhbərliyi Fərid Qayıbova səmimi qəbula görə təşəkkür edib.

Görüşdə nazir müavini Mariana Vasilyeva və nazirliyin bir sıra digər məsul şəxsləri iştirak edib.