Şəhid Rafiq Heydərovun xatirəsinə həsr olunmuş güləş yarışı keçirilib

Noyabrın 20-də "44" günlük Vətən Müharibəsində şəhidlik zirvəsinə ucalan Rafiq Heydərovun xatirəsinə həsr olunmuş U-17 sərbəst güləş üzrə "Təhsil" Respublika İdman Mərkəzinin 2 nömrəli uşaq-gənclər idman məktəbinin açıq birinciliyi keçirilib.

Yarışın təntənəli açılış mərasimi keçirilib. Açılış mərasimi Vətən uğrunda canlarından keçmiş bütün şəhidlərin ruhunun 1 dəqiqəlik sükutu və dövlət himnimizin səsləndirilməsi ilə başlayıb. Daha sonra mərasimdə iştirak edən şəhid Rafiq Heydərovun ailə üzvləri, yarışa dəstək verən Azərbaycan İdman Jurnalistləri Assosiasiyasının prezidenti (AİJA) Eldar İsmayılov və öz vətənpərvər mahnıları ilə yarışa rəng qatan müğənni Təranə Nurlu idmançılar qarşısında çıxış edib nitq söyləyiblər.

Yarışda 10 komandanın 150-yə yaxın idmançısı öz qüvvəsini sınayıb. Dinamik və rəqabətli keçən birinciliyin sonunda yer tutmuş pəhləvanlar yarışın təşkilat komitəsi tərəfindən diplom, medal və qiymətli hədiyyələrlə mükafatlandırılıblar.

Qeyd edək ki, bu il Milli Olimpiya Komitəsinin (MOK) yaranmasının 30 illik yubileyi münasibətilə MOK tərəfindən yarışda iştirak edən bütün məşqçi heyətinə idman geyimləri hədiyyə edilib.