Paris-2024: Azərbaycan komandası bu gün 3 idman növündə mübarizə aparacaq

Fransanın paytaxtı Parisdə keçirilən XXXIII Yay Olimpiya Oyunları davam edir. Bu gün Azərbaycan komandası olimpiadada üç idman növündə mübarizə aparacaq. Mübarizəyə ilk olaraq cüdoçumuz Zelim Kotsoyev başlayacaq. -100 kq çəki dərəcəsində qüvvəsini sınayacaq dünya və Avropa çempionumuz 1/8 finalda Pyotr Kuçera (Polşa) - Tomas Briçeno (Çili) cütünün qalibi ilə qarşılaşacaq. Cüdo yarışlarına Bakı vaxtı ilə saat 12:00-da start veriləcək.

Boks yarışlarında isə Alfonso Dominqes rinqə çıxacaq. 92 kq çəki dərəcəsində yarışan boksçumuz 1/4 finalda qazaxıstanlı Aybek Oralbayla üz-üzə gələcək. Döyüş Bakı vaxtı ilə saat 19:54-də başlayacaq.

Bu gün həmçinin qadınlardan ibarət 3x3 basketbol millimiz də Paris-2024-də növəti oyunlarına çıxacaq. Ötən gün basketbolun yaradıcıları sayılan ABŞ millisi üzərində 20:17 hesablı qələbə qazanan millimiz bu gün bu uğurun ardını gətirməyə çalışacaq. Yığmamız ilk olaraq Bakı vaxtı ilə saat 14:30-da Fransa, 20:30-da isə Almaniya komandaları ilə qarşılaşacaq.

Qeyd edək ki, Paris-2024-də Azərbaycan komandasının 1 qızıl medal var. Yeganə medalı komandamıza cüdo yarışlarnın üçüncü günündə Hidayət Heydərov (-73 kq) qazandırıb.

1 avqust

12:00. Cüdo, kişilər, 100 kq
1/8 final
Zelim Kotsoyev – Pyotr Kuçera (Polşa)/ Tomas Briçeno (Çili) cütünün qalibi

14:30. Basketbol 3x3, qadınlar
II tur
Azərbaycan – Fransa

19:54. Boks, kişilər, 92 kq
1/4 final
Alfonso Dominqes – Aybek Oralbay (Qazaxıstan)

20:30. Basketbol 3x3, qadınlar
III tur
Almaniya – Azərbaycan