Kamandan Oxatma üzrə Azərbaycan birinciliyi və çempionatının açılış mərasimi keçirilib

Kamandan Oxatma üzrə Azərbaycan birinciliyi və çempionatının açılış mərasimi baş tutub.

"Olimpsport" xəbər verir ki, Avropa Oyunları Parkında təşkil olunan yarışın açılış mərasimində ön söz gənclər və idman naziri Fərid Qayıbova verilib.

Nazir federasiyaya yüksək səviyyədə təşkilatçılığa görə minnətdarlığını bildirib:

"İldən-ilə bütün idman növlərimiz inkişaf edir. Paris-2024 Yay Olimpiya Oyunlarında ilk dəfə 15 idman növündə təmsil olunurduq. Kamandan oxatma da bu idman növlərindən biri idi. Təbii ki, hər birimiz Yaylagül Ramazanovaya azarkeşlik edirdik. O, Paris-2024-də mərhələ adlamaqla yeni uğura imza atdı".

Ardınca Azərbaycan Kamandan Oxatma Federasiyasının prezidenti Anar Quliyev Avropa Oyunları Parkına gələn hər kəsi görməkdən məmnun olduğunu söyləyib.

Qurum rəhbəri son illərdə ölkədə kamandan oxatma idman növünün inkişaf etdiyini deyib:

"Bu, qədim idman növünü yaşadan hər kəsə öz təşəkkürümü bildirirəm. Son illər Azərbaycanda kamandan oxatma idman növünə maraq artmaqdadır. Paris-2024 Yay Olimpiya Oyunlarında ölkəmizi təmsil edən Yaylagül Ramazanovanın çıxışını xüsusi vurğulamaq istəyərdim. İnanıram ki, onun açdığı cığırla digər idmançılarımız da gedəcəklər".

Dövlət Himninin səsləndirilməsinin ardından idmançılar sıralama atışları ilə yarışa start veriblər.

Qeyd edək ki, birincilikdə Azərbaycanın müxtəlif bölgələrini təmsil edən 50-dən çox peşəkar idmançı çempionluq uğrunda mübarizə aparır.

Kişi və qadın idmançılar üç kateqoriya - 16 yaşına qədər yeniyetmələr (30 metr məsafə), 16-18 yaşlı gənclər (60 metr məsafə) və böyüklər (70 metr məsafə) üzrə yarışırlar. Oxatanların 1/4 final mərhələsindən finala qədər davam edəcək mübarizəsinə avqustun 25-i yekun vurulacaq.