"Beşiktaş" Avropa Liqasına qələbə ilə başlayıb

Futbol üzrə Avropa Liqasında qrup mərhələsinə start verilib.

Artıq 6 qrupda 12 görüş keçirilib. Türkiyə təmsilçilərindən "Beşiktaş" Norveç "Sarpsborq"unu 3:1 hesabı ilə məğlub edib.

Hər 3 qol fasilədən sonra vurulub. 51-ci dəqiqədə Rayan Babel, 69-cu dəqiqədə Entso Rokko və 82-ci dəqiqədə Ceremeyn Lens fərqlənib. Artırma dəqiqələrində qonaqlar təsəlli qolunu vura biliblər: Kristoffer Zachariassen fərqlənib.

"Akhisarspor" isə evdə Rusiya "Krasnodar"ına yenilib - 0:1. Yeganə qolu 26-cı dəqiqədə Viktor Klaesson vurub.

Daha bir türk komandası - Qazaxıstan "Astana"sı Ukraynanın paytaxtı Kiyevdə "Dinamo"ya məğlubiyyətdən son anda qurtulmağı bacarıb - 2:2. Hesabı 11-ci dəqiqədə meydan sahiblərindən Viktor Tsıqankov açıb. Qonaqlardan Marin Aniçiç 21-ci dəqiqədə bərabərlik qolunu vursa da, 45+2-ci dəqiqədə Denis Qarmaş "Dinamo"nu yenidən önə çıxarıb. Bununla belə, 90+5-ci dəqiqədə Roman Murtazayev yenidən hesabda tarazlıq yaradıb.

Bu görüşdə "Astana"nın heyətində Azərbaycan millisinin yarımmüdafiəçisi Riçard Almeyda 80-ci dəqiqəyədək meydanda olub. "Qarabağ"ın daha bir sabiq futbolçusu Pedro Enrike isə sonadək oynayıb. O, komandasının ikinci qolunda məhsuldar ötürmə müəllifi olub.

Azərbaycanlı Əliyar Ağayevin başçılıq etdiyi hakimlər briqadası isə İtaliyada "Latsio" və Kipr "Apollon"u arasında keçirilmiş qarşılaşmanı idarə edib. Görüş meydan sahiblərinin 2:1 hesablı qələbəsi ilə yekunlaşıb. Hesabı 11-ci dəqiqədə Luis Alberto açıb. 84-cü dəqiqədə Çiro İmmobile penaltidən fərqi artırıb. 88-ci dəqiqədə isə Emilio Zelaya təslli qolunu vurub. Ağayev meydan sahiblərindən 3, qonaqlardan 1 futbolçuya sarı vərəqə göstərib.

Avropa Liqası

Qrup mərhələsi, I tur

20 senytabr

G qrupu

20:55. "Rapid" (Vyana, Avstriya) - "Spartak" (Moskva, Rusiya) - 2:0

20:55. "Vilyarreal" (İspaniya) - "Reyncers" (Şotlandiya) - 2:2

H qrupu

20:55. "Latsio" (İtaliya) - "Apollon" (Kipr) - 2:1

20:55. "Marsel" (Fransa) - "Ayntraxt" (Almaniya) - 1:2

I qrupu

20:55. "Beşiktaş" (Türkiyə) - "Sarpsporq" (Norveç) - 3:1

20:55. "Genk" (Belçika) - "Malmö" (İsveç) - 2:0