Azad Rəhimov: “Gənclər Azərbaycanın firavan gələcəyinə inanırlar”

“Ulu Öndər Heydər Əliyev 1993-cü ilin sentyabr ayında Ali Sovetdə ilk görüşünü məhz gənclərlə keçirib. 1994-cü ildə isə Gənclər və İdman Nazirliyi təsis olunub. Bu, Azərbaycanda gənclər siyasətinin başlanğıcı idi”. Bu sözləri jurrnalistlərə açıqlamasında gənclər və idman naziri Azad Rəhimov deyib.

Nazir dövlət başçısı tərəfindən gənclər və idman sahəsinin inkişafı istiqamətində 3 proqram imzalandığını və Azərbaycanda uğurlu gənclər siyasəti aparıldığını vurğulayıb.

Nazir bu gün Azərbaycan Gəncləri Gününə həsr olunmuş respublika toplantısında Prezident İlham Əliyevin çıxış etdiyini, gəncləri təbrik edərək onlara öz tövsiyyələrini verdiyini diqqətə çatdırıb: “Dövlət başçısı görüşdə bir neçə fəal gəncə yüksək Prezident mükafatları da təqdim etdi. Cənab Prezident çıxışında həmçinin xüsusilə vurğuladı ki, gənclər həqiqətən də Azərbaycanın gələcəyidir. Gənclərin çıxışlarından da hiss etdik ki, onlar Prezidentin ətrafında sıx birləşərək Azərbaycanın firavan gələcəyinə inanırlar. Bütün gəncləri bir daha ürəkdən təbrik edirəm və onlara uğurlar arzulayıram”.